| Գլխավոր էջ » Հոդվածներ » Հոդվածներ |
Հայաստան-Լեհաստան երկկողմ համագործակցության ձևաչափում մշակութային կապեր
| 19.09.2013 ՀՀ մշակույթի նախարար Հ. Պողոսյանն ընդունել է Լեհաստանի Հանրապետության մշակույթի և ազգային ժառանգության նախարար Բ. Զդրոյևսկուն  Ս. թ. սեպտեմբերի 19-21-ը պաշտոնական այցով Հայաստան է ժամանել Լեհաստանի մշակույթի և ազգային ժառանգության նախարար Բոգդան Զդրոյևսկին և նախարարության արտաքին կապերի վարչության պետ Մարչին Լապցինսկին: ՀՀ մշակույթի նախարարությունում սեպտեմբերի 19-ին կայացած հանդիպմանը ՀՀ մշակույթի նախարար Հասմիկ Պողոսյանը ողջունել է գործընկերոջն այցի կապակցությամբ և նշել Հայաստան-Լեհաստան երկկողմ համագործակցության ձևաչափում մշակութային բաղադրիչի կարևորությունը, որը լավագույն խթան է տարածաշրջանում մշակութային համագործակցության զարգացման համար: Հանդիպմանը կողմերը կարևորել են 2011 թ. «Հայաստանի Հանրապետության Կառավարության և Լեհաստանի Հանրապետության Կառավարության միջև մշակույթի, կրթության, գիտության բնագավառում 2011-2013 թթ. համագործակցության մասին» համաձայնագրի ստորագրումը, որի շրջանակներում իրականացվել են մի շարք կարևոր ծրագրեր: Այս համատեքստում, Հ. Պողոսյանն անդրադարձել է Հայաստանի գործուն մասնակցությանը Վարշավայի գրքի փառատոնին, որտեղ 2012 թ. հայ գրատպության 500-ամյակի շրջանակներում Հայաստանը ներկայացել է պաշտոնական հյուրի կարգավիճակով: Այնուհետև, անդրադարձ է կատարվել վերջին տարիներին Արևելյան գործընկերության շրջանակներում իրականացված ծրագրերին, մասնավորապես՝ երիտասարդ երաժիշտ-կատարողների հմտությունների բարձրացմանը և փորձի փոխանակմանն ուղղված՝ «I Culture» մշակութային նախագիծին, ինչպես նաև՝ միջազգային կինոփառատոների, թատերական փառատոների ընթացքում հայ և լեհ կինոռեժիսորների, թատերական գործիչների մշտապես մասնակցությանը /Հայաստանում իրականացվող «Արմմոնո» միջազգային թատերական փառատոն, «Ոսկե Ծիրան» միջազգային կինոփառատոն/: Հանդիպման ընթացքում կողմերը հստակեցրել են 2014 թ. Սոպոտի մշակույթի պետական պատկերասրահում կազմակերպվող Հովհաննես Այվազովսկու ցուցահանդեսի և Հայաստանի ազգային պատկերասրահում Թեոդոր Աքսենտովիչի ցուցահանդեսի կազմակերպման մանրամասները: Քննարկվել է 2015 թ. Լեհաստանում Հայաստանի մշակույթի օրեր և փոխադարձաբար՝ Հայաստանում Լեհաստանի մշակույթի օրեր կազմակերպելու հարցը: ՀՀ մշակույթի նախարար Հասմիկ Պողոսյանն առաջարկել է Հայաստանում կազմակերպել Ֆ. Շոպենի անվան ամենամյա փառատոն, որի իրականացման գործընթացը կքննարկվի առավել հանգամանալից: Հանդիպման վերջում Լեհաստանի մշակույթի և ազգային ժառանգության նախարար Բ. Զդրոյևսկին շնորհակալություն է հայտնել ՀՀ մշակույթի նախարար Հ. Պողոսյանին ջերմ ընդունելության և հայ-լեհական մշակութային կապերը պատշաճ մակարդակի վրա պահելու համար: ՀՀ մշակույթի նախարարություն Աղբյուրը: http://mincult.am/home-1-1642.html | |
| Դիտումներ: 1007 | Տեգեր: | - Վարկանիշ -: 0.0/0 |
| Մեկնաբանություններն ընդամենը՝: 0 | |
